Puesia

Cavalchessinu  un cavallu corsu e vostre muse è ch’ellu galoppi à chjoma sciolta u vostr ‘ estru pueticu  !!
Aspettemu i vostri scritti per fà campà stu spaziu.
D’altri l’anu fatta, avà tocc’à voi !

Si ni và à bridda   sciolta
L'annu chì si cumpii avà,
Purtendu ugni brama colta
Tessa di fedi è libartà,
È issu stintu d'una volta 
Chì ci tucca à tramandà.

Semu à u crucivìa 
Trà avvena è passatu,
Scurdendu a nustalgìa
Di ciò ch'oghji hè sguassatu,
Si principia in aligrìa 
Un novu chjassu tracciatu.

Aspittendu l'annu à vena
L'ultima rima vi facciu,
È cù a musa serena
In puisìa v'abbracciu,
Ch'iddu campi à vita lena
U nosciu caru Paganacciu.


Ghjuvan ´ Federicu Terrazzoni


Un Cavallu Corsu

Vecu di punta à u monte

Escendu di a bufeghja,

Bianchi cum’è l’alte fonte,

Nivuloni di puleghja

È sentu à l’orizonte :

Un cavallu frumiteghja...

 

Sentu un rimore prufondu

Duve u silenziu si tronca

Fendu trimulà l’attondu,

Hè l’unghjola chì accionca.

Vecu luccicà in fondu

Un cavallu chì s’imbronca.

Mi sentu propiu cummossu

Eppo fermu silenziosu

In stu locu quantu possu

Mi stò zittu è à l’ascosu...

Feghju stu cavallu corsu

Cusì fieru è misteriosu.

 

S’eu m’avvicingu troppu

Sò chì si n’hà da andà

Ma ci aghju a pena in corpu

D’ùn pudellu carizzà...

Guarda è parte à u galoppu

Lascendumi sunnià...

À u spuntà di a sera

È u ciuttà di u sole,

Vecu luce una criniera

Trà e sponde muntagnole

Purtendu l’omu chì spera

Trà tanti sogni è fole.

Tittò Bianca

 u 5 di ferraghju di u 2013


 

À chjoma sventulata

U core muntagnolu

À l’alba appena nata

Ne piglia lu so volu

Cavallu libertà, cavallu libertà.

 

D’isulella impastatu

Di fium’ è di calanche

À galoppu serratu

Basgi le cime bianche

Cavallu libertà, cavallu libertà

 

À fiancu à li to passi

S’hè intricciata la storia

Stampata ind’è i chjassi

Quant’è ind’è a memoria

Cavallu libertà, cavallu libertà.

 

Corri corri cumpagnu

Sin’à tuccà e stelle

Porta lu nostru sognu

Fattu d’ore più belle

Cavallu libertà, cavallu libertà.

Eric Barre


Chì augurà si face
Cù li detti più sinceri
Dunque n'ùn mi possu tace
Pè l'amichi cavallieri
Cun elli salut'è pace
Pregu à corsi è furesteri

Jean-Charles Adami


L'arditi cavalieri vi mandani tanti auguri di bon natali,

di felici capu d'annu è di galoppi sfrinati

Marceddu Jureczek 


L'Associu U Cavallu Corsu prega bone feste di natale è un bon'capu d'annu

a tutti quelli chi galoppanu in sta terra di Corsica...

erba bona è libertà

Patrick Croce


Tanti auguri è bon dì è bon’annu cavallinu

È ch’ellu sia u Cavallu Corsu

Cavallu di focu è brusgia ventu

Chì corre cum’è l’onda sopr’à u tempu

Purtendu u so cavalierru ancu senza morsu

Guy Cimino


O lu mio cavallu corsu natu pè l'alte muntagne

Figliolu di l'aira pura di e pascure suprane

Ne sai pate arsure, buriane è sciappittane

Claude Bellagamba


L' Associu u Cavallu Corsu vi prega galuppate

à chioma sciolta per andà da un capu

d'annu à l'altru è ch'ellu vi sia datu à tutte : salute è pace.

Pierre Laurent Santelli


I dodici cavaddi di u 2013 oramai sò passati.

Ma d'altri sfrisgianu à l'orizonti, ancu più belli !

Chì l'armenti di u 2014 vi sianu pieni di vita d'amori è di prugetti

Bon dì, bon annu, è bon capu d'annu à tutti.

Paci è saluta !

Stefanu Cesari


Umbra chinesa di l’omu nant’à a crista… Viaghja versu l’annu novu, à cavaddu.

L’incasciu di u so fucili chì cumparisci daretu ad iddu, liatu à a sedda…

Sò à dui ori, chì u suvetani. S’iddu riesci à metta versu i fiuma, piddarà u largu.

U cavaddu si lampa in a scarpiccia, l’unghjola sicura.

U cavaglieri l’accarezza u fiancu, li parla bassu à l’arichji.

Falani, à quel versu ma falani.

Un colpu di focu chì veni da a crista. Po’ un altru. I fighjola surridindu, ironicu.

Ùn hè più a purtata di tiru. Puri u cavaddu chì si moscia un pocu inchietu. U rassicurighja torra cù a mani.

Po’ u sprona, è parti à u galloppu, è sà chì u so distinu hè liatu à l’animalu.

Galloppa, è ridi, è a muntura chì pari di sfidà u ventu…

Ch’iddi sfidessini tremindui st’annu novu…

È varcallu, libari è indomiti…

Com’è no tutti…

Marco Biancarelli


Aghju sunniatu a Libertà

eppo mi sò discitatu

incatinatu

à un mondu troppu chjucu

à l'idee trapassate

à e paure, à i silenzii

avvitatu

à e strade troppu strette

à credenze arrughjinite

à parolle tantu vane

ma sò Cavallu Corsu

è lu mio core hè

di fede, di passione

è di sognii à fà li veri

à li mio fratelli

à li mio pari

à quelli chì capisceranu

vi pregu fede è passione

è vi pregu Libertà

tanti prati assulanati

e galoppi infiniti

cu lu ventu in la chjoma

Angelique Bazziconi

 

 

© 2017 | Cheval Corse - Site officiel | Facebook | Plan du site | Réalisation Isula Informatique